Чингис "KING SIZE" -д сэтгэгдэл хэрэггүй

Өнөөдөр gogo мэдэллийн сайтнаас мэдээ уншиж байгаад нэг ийм нэртэй "King size" мэдээ олж уншлаа. Мэдээний гол агууллга нь Спирт бал бурам ХК-ны Чингис брэндийн савалгаанд өөрчлөлт орсон талаар байлаа. Мэдээний хувьд ч ярих юм байхгүй маш сайн PR мэдээ болсон байна. Харин "Уучлаарай, энэ мэдээнд сэтгэгдэл бичих боломжгvй байна" гэсэн өгүүлбэрийг уншаад үнэхээр гайхав. Спирт бал бурам ХК-ны Чингис брэндэд болон gogo.mn-нд хэрэглэгчдийн санал шүүмжлэл үнэхээр хэрэггүй гэж үү? Эсвэл тэд хэрэглэгчдийн санаа бодол бидэнд огт хэрэггүй хэмээн үзэв үү. Ямартаа ч ийм асуудал байна гэдэг үнэхээр харамсалтай.

Бизнесийн байгууллагад тэр дундаа ийм олон жилийн түүхэн замналыг туулж ирсэн брэнд бүтээгдэхүүнд хэрэглэгчдийн үзэл бодол юугаар ч сольшгүй үнэ цэнэтэй байдаг. Хэрэглэгчдийн бодол санаа, үйл хөдлөлийг дагаж тухайн бүтээгдэхүүн хувьсан өөрчлөгдөж байх нь маркетингийн алтан дүрмийн нэг. Магадгүй Чингис брэнд хэрэглэгчдийн зан төлөв болон, сэтгэл ханамжийн судалгааг хийсний үр дүнд шинэ төрлийн савалгааг бий болгосон байх. Харин тэгвэл одоо шинэ савалгаа хэрэглэгчдэд хэр таалагдаж байгаа талаар санал шүүмжлэл яагаад авч болохгүй гэж? Нөгөө талаараа Монголын томоохон портал сайтны нэг gogo.mn ч мөн адил интернэт хэрэглэгчдийн хүсэл сонирхлыг ингэж дураараа хаах үндэс байхгүй. Интернэтийн орчин өндөр хурдаар хөгжиж байгаа үед Дэлхийд алдартай олон вэб сайтууд руу орж мэдээлэл авч байхад gogo.mn шиг хэрэглэгчдийнхээ сэтгэгдэл бичихийг шууд хаасан вэб сайт байдаггүй. Ихэнх сайт шууд бичих эсвэл тухайн сайтны хэрэглэгч болоод бичих гэсэн сонголтууд байдаг. Тиймээс gogo.mn ч мөн адил үүндээр анхаарах нь зүйн хэрэг юм. Логикоор бодоод үзвэл вэб сайтны гол зорилго бол олон байнгын хэрэглэгчтэй болох улмаар тэдний сэтгэгдлийг олноор нь авахад оршдог билээ. Эсвэл нөгөө Монгол зангаараа төлбөртэй мэдээнд сэтгэгдэл оруулж болдоггүй юм болов уу?